Tura songjinmao Basketball kal·na gisiko nanggipa manderang Garo Hills ni chadamberangna sakgittamgrik kal·gipa 3×3 Summer League Basketball susaaniko Don Bosco College Tura o ong·atanggipa da·al salo chu·soke matchotangaha.
Ia kal·susaanio Garo Hills-ni dingtang dingtang a·jarangoni basketball kal·gipa dolrang chena ka·kimchae bakko ra·angaha jeon me·asa dol 19 aro me·chik dol 7 mang susagrikangaha. Final o me·asa dolrangni gisepo Tura-ni Lycans aro Resu-ni North Wolf dolrang susagrikangaha.
Ia susagrikanio Tura-ni Lycans basketball dol chegipa ong·aha aro Resu-ni North Wolf gnigipa biapko man·angskaaha. Apsandake me·chikrangni final kal·susaanio Resu-ni Salgro13 aro Resu-ni Diva drive dolrang susagrikangaha jeon Resu Salgro13 dol chegipa ong·angaha.
Kal·susaani bon·kamgipa bakko 3×3 Summer League basketball o susaanggipa me·a aro me·chik dolrangoni nambate kal·susagiparangna Most Valuable Player (MVP) ni boksisrangkoba on·angaha. Me·asarangoni Lycans doloni Bian Karik Ch. Marak aro me·chikrangoni Salgro13 doloni Sonaisa G. Momin MVP boksisko man·angaha.
Kal·susaanio chegipa aro gnigipa ong·gipana dolrangna cash prize aro trophy rangkoba on·angaha.
