North Garo Hills a·jao chiring chibisikrang aro chiakolrangni tipanganiko nike, mikkangchi apsandake salrang rakangkuaiode chirangna dilnaba gnang ine niksamsoe ja·ku de·aniko dakna Thapa Darenchi wilwilani Development Commitee, Nokma, Sordarrang aro songni manderang tom·e chanchirimangaha. Uamangni tom·e chanchirimanio Damring chibimao matchu, wak mate ba uandake mitchigipa soa sima jabolrangko galenganina, na·tok na·batrangko bisi on·e rim·enganina, paikanani aro rubber jetani chirangko watate chibimako nisiatenganiko champengnagita tik ka·angaha.
Da·ororo a·jao chirangna dile dilsakamkam jokenggipa Damring chibimako jakkalna nangenganina chibimako nosto ka·gipa kamrangko dakjachina aro chibimaona braegipa pilak chonchongipa chiringrangkoba rongtale rakkichina didiangaha. Damring chijolnikosan ong·aigija bol wa·arangko den·ramrame rojachina aro man·a dipet chirangko tangatgipa bolrangko ge·dapchinaba Thapa A·kingni Nokma tom·anio agandapangaha.
Ia dongimin niamrangko saoba pe·e Damring chibimao sia soa, bisi on·e na·tokrangko rim·ode, gari susrangode aro chibimako nosto ong·atgnigipa kamrangko ka·aniko rim·a man·genchimode gong 5,000 tangkarangko dai gamnagita nanggen ine jinma ku·monge ra·chakangaha. Unbaksana uamangni chanchirime dai gamatna tik ka·e segatgimin lekkako a·jani Deputy Commissioner-naba sokatgen ine Thapa Darenchi Development Committee-ni Secretary Drowerson K. Marak u·iatangaha.
