West Garo Hills Selsella songjinmao gital C&RD Block nokko rika cho·anirango adita chu·ongmangijanirangko nikna man·e, Selsella jolni bakrimgimin NGO dolrang jekai ASWA, GSU aro FKJGP rang Block Development Officer na chitti seate name nipiltaianiko dakchinagita u·iatangaha.
Batanggimin somoio iani bidingo RTI ka·anio ia gital block nokko riknagita sorkari gong crore 3 tangka paisarangko chamataha ine u·ina man·aha jeon rikkenggipa biapona NGO dolrang re·ange nianiko dakon rika cho·ani kamrang chamatgimin tangka paisani kri ong·manjaenga ine ma·sina man·skaaha. Ia gital block nokko Reinforced Cement Concrete (RCC) rikchinagita miksonge tangkarangko chamatgenchimoba da·alo ia nokko Assam type buildingkosa rikskaenga ine janapataha. Indake rika cho·anirangna chamatgimin tangka paisanigita kamrangko tik ong·e ka·jaenganina tangkarangko kraa bewalo jakkalengama ba jakkalsretengama ine NGO dolrang sing·doaniko dakangaha.
Ia gitalgipa nokko rikkanio bosturangko jakkalanio chu·gimik badita korosrang ong·aha uarangko NGO dolrangna u·iatchina aro manderangna ka·donganiko on·a man·agita kraa bewalo rikchina didiangaha. Uamangni dabiagita rika cho·aniko nipiltaianiko dakjaode aro name talate on·a man·jaode gital building ko oprakani somoio bakko ra·jawa aro jegalaniko dakanggen ine mikrakatanikoba on·angaha.
Unbaksana, janapgimin NGO dolrang Selsella jolo songdongenggipa manderangni namgnina aro rang·gitik a·selrang ong·aoni naljoke rakkina man·agita, Fire & Emergency Service Station ko ra·bae on·china a·dokni Chief Minister na chittiko see mol·molataha.
Uamangni janapatani gitade Selsella jolo songdongenggipa manderang jelbatroroaniko nikgenchimoba rang·gitik a·sel ong·ani jekai wa·alrang kamani somoio, wa·alko kimite galgipa dangdike on·giparang dongkujaengani gimin bang·a changon nisiataniko chagrongna nangenga ine u·iatangaha.Ia pilakkon nigrike songdongenggipa manderangko naljoke rakkina aro songsalko nirok simsakanio nambatatna man·agita Selsella-o Fire & Emergency Service Station ko ta·rakkale ra·bae on·pachinagita NGO dolrang mol·molataha.
