Rongjeng jolni Koksi songo ka·singipa ringaniko ringe adita somoirangni ja·mano be·en an·senggijani ong·e aro skorang miksulna a·bachenge paningsa sakgni nombokaha ine koborko man·soaha.
Pagipa saksa Koksi songo dokan dakgipa ong·a aro uandaken ua re·anggipa somoio Rongjeng bajaroniko ka·singipa ringani drupe cola ko an·tangni dokano palnagita carton ge·sa ra·baaha. Ua ka·singipa ringanirangko palanio sal ding·ani gimin jolni manderang bree ringtokani gimin bon·ekon pale ge·sako an·tang ringnagita rakkirikenba adita ringe ua an·tangni bilsi 7 ong·gipa depantenaba on·aha ine u·inagita man·aha. Ringani ja·man uamang paningsa skorang miksulna a·bachenge nombokaona sokaha. Uamang paningsako bakan Rongjeng Health Centre Hospital-ona joljol rimangaha.
Uamangko sanna bannanio chu·sokgipa ong·e ua salni attamon joljol nokchina watatpilnagita man·aha. Indake ong·genchimoba skorang miksulkuengani gimin uamang salgipino hospital-ona re·angtaie porikka ra·e niangkuaha. Indakgipa obosta ong·genchimoba da·o dipet jolo bree ringgiparangoni saksakoba indakgipa obostao chagronganiko knakujaenga ineba u·inagita man·aha.
Ia obosta ong·anina a·jani Medical and Health Officer aro Food Safety Officer-ko iarangni bidingo am·sandianiko dakchinagita a·jani DC Vibhor Aggarwal ge·etangaha. Unbaksana iani bidingo am·sandianiko daknagita dokano palenggipa pilak drupe cola ringanirangko ra·bae porikka ra·e nianiko daknagitaba watataha ine SP A S Rynjah u·iatangaha. Uamang paningsa je bottle-oniko ringe obosta ong·ahachim uko bon·e ringani gimin man·jaha ineba SP parakataha.
