A∙doko ia bilsini gisepo da∙o dipet bijoli den·a nangkujaenga aro mikkangchiba maming neng·nikanirang dongjaode bijoli den·a nangaoni naljoknagita kamrangko ka∙enganiko Power Minister AT Mondal aganangaha. Ia bilsini board porikkao aro Lok Sabha election ni somoio MeECL department bijoliko chu·onge watna man·aha ine Mondal parakangaha.
Iarang pilakan hydro power project ba chioniko bijoli bikotna man·ao aro mikka waanio pangchaka ine Mondal talatangaha. Re∙anggipa bilsiogita ia bilsioba mikka waanirang ja·manchakenga aro re·baenggipa antisa ba antignini gisepo mikkarang wagenchimode maming dakeba bijoli den·anirangko daknagita nangjawa ineba Mondal aganangaha.
Re∙anggipa bilsio songjinmarango konta 7 mangna aro songadamrango konta 9 mangnigita bijoli den·anirangko dakangaha, indiba ia bilsio bijoliko maming neng·nika gri watnagita Chief Minister Conrad Sangma ni miksongani gnang aro iako chu·sokatna department raken kamko ka∙enga ine Mondal aganangaha. Bang·bata changon bijoli den·anirangko dakaniara dingtangmancha bijoliko name watna man∙agita sub-station-rangko taridapna, transformer-rangni nosto ong·aniko tariani aro buring bolgrimranggita bijoli sringgipao bolrang be·jetaniko gal·oke rongtalatna nangani a·sel ong·aha ine Mondal agandapangaha.
