Re·anggipa April 28 tariko Tura Matchikol-o a·sel ong·anio kate chakgipa dumper truck-ko salgipa mandeko Meghalaya pulis dolrang Assam Salmara police rangni dakchakanichi rim·na man·angaha. Ia a·sel ong·anio dumper truck-ko salgipa Kazimuddin kate jokna jotton ka·engmitingo, Assam-ni South Salmara Dhanua-oniko South Salmara pulis dolrangni bakrimanichi rim·nagita man·aha. West Garo Hills-ni pulis dolrang a·selo ga·akgipa mandena kakket bichalko ra·bae on·agita kamrangko ka·angenga aro nambate u·inagita am·sandianirangko dakangkuenga ine West Garo Hills-ni SP aganangaha.
April 28 tarik pringni 10:25 bajimango, Araimile Police Station-o telephone-gita Matchikol-ni rama bibrao a·sel ong·ani koborko manderangoniko man·soa bakan a·sel ong·chakgipa biapona ta·raken re·ange sokangaha. A·sel ong·anio bike-ko salgipa bilongbee saknaanirangko man·ahanina, uko ta·raken Tura Civil Hospital-ona sanna bannaniko daknagita ra·angaha. Ia ong·a obostani bidingo sing·sandianirangko dakon Dumper truck registration number ML-08K 0929 aro bike registration number ML-08C 2825 ong·a ine ma·sinagita man·e, Araimile Police Station-o case No.21(4)2024 U/5 279/336/337/338 IPC-o pangchake mokordoma ka·angaha.
