GNLA-R o mongsongbatgipa bak donggipa mande aro dolko bikotdilgipa Simon G. Momin ko pulis dolrang da∙al rim∙na man∙aha ine koborna parakataha. Pulis dolrangni u∙iatanigitade, re∙anggipa March ni 15 tariko Sengsrang N. Marak, Thosengcheba A. Sangma aro Chijang A. Sangma ko rim∙na man·anichi West Garo Hills Pulis dolrangni dingtangmancha am∙sandianiko dake April ni 25 tariko Simon G. Momin aro Rakban Ch. Momin ko North Garo Hills, Dainadubi jolni Gambil Apal songoniko uamang sakgniko rim∙na man∙aha.
Ua manderangoniko ge∙gittam mobile phone aro ge∙gni sim card rangkoba man∙aha ine u∙iatangaha. GNLA-R dolko bikotdilgipa Simon re∙anggipa somoirango A∙chik National Liberation Army (ANLA) aro A∙chik Matgrik Elite Force (AMEF) dolrang baksaba bak donga ine u∙inagita man∙aha. Batanggimin somoio Simon ko Arms Act case-o West Khasi Hills aro East Garo Hills-oba rim∙ako man·aha ineba ma·sinagita man·aha. Unbaksana drae tangkarangko dabiani aro mande rim∙srukani bidingoba uko South Garo Hills-o rim∙ako man∙aha.
Mikkangchi indakgipa ka·mikkenatani aro tangkarangko dabianirangko knagenchimode, sepangbatgipa Police Station-ona re·ange koborko on·chinagita pulis dolrang didiangaha aro kobor on·timgipa mandeni bimungko darangnaba u·iatjawa ineba u·iatangaha.
