East Garo Hills, Dobu jolni NGO dolrangni nangana bate gue badinggiparangoniko tangka paisarangko gilanirangko nirokatchinagita jolo songdongenggipa manderang a·jani Deputy Commissioner-ko mol·molataha.
Uamangni u·iatanigitade gue badinge cha·enggipa manderang bag prako gong 4000 ba 4500 damo mangmangba palnagita neng·nikaniko man·engon, NGO dolrangni nangana bate kajina ra·anichi neng·nikaniko man·enga ine janapataha. Komia damo palna nangani kosako rama korosrangna gamnagita bang·genchimode game ge·e cha∙giparangna maming lap dongjaenga aro basakobade batesa gamdopilna nangaona sokenga ineba u·iatangaha.
Rongjeng aro Rongmil jolrangoba gue bag 1 ko gong 4000 ba 4500 ka·e palnagita man·enga jeon NGO dolrang ma·sichake adita on·gilanigitasan uamang tangkarangko gong 10 ba 20 rangsan ra·rikronganiko dakronga. Indake ong·genchimoba Dobu jolni NGO-rang an·tangtangni nangnikagitasa dabie tangkarangko ra·rikrongenga ine jolni manderang u·iatangaha. Unbaksana Dobu jolo NGO dolrang ge 10 na batpile donga jekai GSU, FKJGP, GSMC aro gipin dolrang bang·bea ineba u·iatangaha. Uni kosakon GSMC dolrang A·chik jatna kam ka·na ine ja·ku de·gipa ong·genchimode indake jatskani pale sim·e cha·aoniko tangkarangko gilna nangja ineba matnangataha.
Indake tangkarangko nangana bate gilaniara niamni a·palo ong·a aro pilak biaprangon NGO dolrang donggenchimoba, uamang gue salgipa garirangonikode tangkarangko ra·jaenga. Indake tangka gilanirangko dontongjagenchimode a·jani SP na chitti sedoanirangko dakanggen ineba u·iataniko dakataha.
