MIDC ni Chairman James Sangma, Tura District Cricket Association (TDCA) ni Chief Advisor songako man·e TDCA ni memberang baksa Alotgre cricket kal·chakramo tom·e uamangni neng·nikanirangko tale ma·sie ra·angaha. Sangma, dingtangmancha una cholko on·e daitoko pakwatanina mittelangan baksana mikkangchi Garo Hills-o cricket kal·aniko nambata gadango ra·dona kam ka·anggen ine aganangaha.
Ia somoio TDCA ni memberrang bang·a neng·nikanirangko gital songa man·gipa Chief Advisor na parakataha. Uamangni kal·chakram biapko nirokanio neng·nikaniko, bosturang komianiko aro tangka paisarangko man·a neng·nikanirangko janapangaha. Unbaksana, TDCA ni coach, cricket kal·aniko a·jao nambatatna ge·gipin kal·chakram biapko tarie on·chinagitaba mol·molangaha. Cricket ni a·bako namdapatna uamangni dingtang dingtang kam ka·anirangko TDCA ni President talatangskaaha.
Uamangni agananirangko knae, TDCA ni krenge kam ka·ani a·selo Ranji trophy rango aro gipin susaani gadangrango Garo Hills ni chadamberang cholko man·angenga ine James Sangma aganangskaaha. Ua da·al salo tangka paisanigita adita on·gile dakchakanikoba dakangaha aro uamangni janapgimin neng·nikanirangko mikkangchi BCCI baksa golpogrike niatchina mol·molanggen ineba parakangaha.
