Chokpot thanao mokordoma ka·anio sing·sandianiko dakenggipa Pulis Officer, D R. Marak ni okamatako man·anina Social Activist aro Human Rights and Anti Corruption Youth Power of India ni Flaming B. Marak sokangna chol ong·gijaniko chitti see u·iatangaha.
Uni parakatanigitade Marak an·tangni kam nanganina Shillong re·angna nangao ga·ake, April 27 tarik pring 11 bajimango section 41-A ko jakkale uko okamataniko jegalatangaha. Mandeni kosako kakketgipa sakkirang dongjaode, maiba badi ka·anirang aro dosi dakani dongjaode sing·sandigipa Officer ni okamatoba re·angna nangani dongja ine ua parakataha.
Dosi dakako u·igijagipako court jako ra·na bil dongja, section 41-A ni section 499 aro 500 IPC ni ning·o dosi dakanio potchipa man·gipako dorgastoko niam donggimino pangchake court aro pulis sing·sandina man·ja ine Marak talatangaha. Section 155 (2) o pangchake darang pulis officer sakki grigipa aro dosi dakako name ma·sigijagipa mokordomako Magistrate-ni ge·eta donggija jako ra·na man·ja ine Marak aganangaha.
Unbaksana batanggimin salrango mokordoma ka·anirangko bon·kame knana nangengkugiparang dongengkuani gimin aro court na pakwatahani a·selo, 500 IPC ara court ni kosako mande ra·gijaniko mesoka ine Marak parakataha.
