Da·al salo Tura Don Bosco College o “Need and Opportunities in Education in Garo Hills” katta bichongko ra·e A·chik a·songo poraia skiani a·bao nanggipa aro dingtang dingtang cholrangni bidingo chanchinagita salsani Symposium ko ong·atangaha. Ia chanchirimaniko Tura Don Bosco College ni conference hall o Martin Luther Christian University (MLCU), Shillong baksa nangrime ong·ataha.
Ia salsana tom·bimonganiko ong·atna a·dokni Education Minister Rakkam A. Sangma aro Meghalaya Industrial Development Corporation Ltd. (MIDC) ni Chairman James P K. Sangma jaksrambee tangka paisachi bil on·e dakchakan baksana didianganiko on·angaha. Tom·bimonganiona West Garo Hills a·jani Deputy Commissioner Jagdish Chelani mongsonggipa sokgipa ong·e chanchirimani tom·bimonganiko oprake on·an baksana adita ka·na nanggnigipa kamrangni bidingo chanchidilangaha. Apsandake symposium ona MBOSE ni HS Branch, Deputy COE, Dr. Shiny Ch. Sangma, Shillong MLCU ni Vice Chancellor Prof. T. K. Kharbamon, ICFAI University Meghalaya ni Dean Viola Sonachi B. Sangma aro Tura Don Bosco College ni Principal Fr. Bivan Rodriques Mukhim ba bakko ra·angaha.
Battanggimin bilsini January jani 21 tariko a·dokni janerarango “Garo Hills education indicators worryingly poor” ba “Garo Hills o poraia skiani namen bilgrianio jajrengna nanggni” ine headlines ko one bang·a seanirangko niknagita man·aha jean a·dokni manderangna mongsongbate Garo Hills ni skia poraiani a·bao kamrang bilongen namjaenga ine parakangaha. Iako aganengon poraia skiani a·bao South Garo Hills a·jao namjabatenga ineba janapataha. Indakgipa obostarangni bidingo golpo chanchirimanirangko dakna aro Garo Hills ni dingtang dingtang a·jarango skia poraiani gadangrangko namdapatna aro tang·doatna gita dingtang gadango skie on·giparang da·al salsani tom·bimonganio sokbae golpo chanchirimaniko dakangaha.
Ia chanchirimanio uamang Garo Hills o bang·a skulrango skigiparangni chu·ongijani bidingo, skigiparangchi skina sapa sapgijani bidingo, skul re·anio dongtongani, poraianio chu·sokani, Garo Hills o skulni headmaster rangni neng·nikani, NEP 2020, jatni daka rikarang maikai skia poraiani gadango dakchaka aro chatro chatrirangko nambate masibatatna A·chikkuko jakkale skiani bidingoba golpoe chanchirimangaha.
