Da·ororo nangana bate ding·anirang batroroenganina aro chiring chibisikrangni tipangani gimin, District Disaster Management Authority (DDMA) nigita DM ACT 2005, Section 30 ni bilo pangchake jinmana ku·pattiangaha.
Iarangko champengnagita DDMA-nigita adita beng·anirangko aro ja·rikna nangani niamrangko ge·etangaha jean:
1. Chiringoni 50 meter-ona kingking gue, cashewnut aro rubber bol dakgiprangko ge·nabe.
2. Chiring chibisik sepango bol wa·arangko bang·e ge·bo, jekai bolchim, wa·a, kimde, bolbok aro chiko tange rakkigipa bolrangko ge·bo.
3. Chiring chibisik sepango a·ba cha·anirangko daknabe maina uarang chiring chibisikrangko tipatgen.
4. Bol wa·a ge·arangni gimin songni Nokma ba dilgiparang awareness programrangko songo noko ong·atna nanga.
5. Chiringrangoniko ro·ong ba an·chengrangko bikotnabe.
6. Songo noko donggipa sakantian ku·mong nangrime chiring chibisikrangko ripingna apsan kam ka·na nanga.
7. Mai dakgipa bol wa·arangko ge·ode namgen uarangko Forest Departmentchi re·ange sing·sandichenganiko dakna nanga.
8. Soil & Water Conservation Department-nigita chiring chibiksrangko maidake tange rakkigen uarangni gimin songo noko donggipa manderangna awareness program-ko ong·atna nanga.
9. Council of Nokma Association-nigitaba chiring chibisikrangko tange ripingnagita rake kam ka·na nanga.
10. Tura area-o donggipa chiringrang jekai Ringrey, Nengsangram (Upper Babupara), Rongkhon chiring, Gandrak chiring ba uandakgiparangko rongtale rakkinagita nanga aro jakkalna ma·nagita Tura Municipal Board department-nigita uarangko nirokna nanganikoba janapangaha.
