Da·ororo ong·enggipa obostarango pangchake, kakketgijagipa koborrangko social media rango mongsongbate whatsapp-o name talchenggija ba am·sandianiko dakchenggija saksa sakgipinna watgrikanirangko dakjachinagita Garo Hills-ni pilak organisation-rang mikrakataniko aro didianiko on·angaha.
Ia ong·gija koborrangko gipataniara manderangni gisepo jajrenganiko ra·baan baksana jatsa jatgipin baksa melie nangrime dongaoniko kajia golmal ka·anisan ong·a aro nisiatgrikani ba dakgrik dinggrikaona ra·banagita namen altubegipa ong·a ine uamang aganangaha.
Manderang je koborrangko man·sogenchimoba uni ja·pang ja·dilko name talchenggija gipatgenchimode, uamangni kosako raka sinjetaniko on·an baksana pilak dongimin niamo pangchake sastiko on·anggen ineba uamang mikrakataniko on·angaha. Indakgipa kakketgijagipa koborrangoni naljoke dongnagita mikkangchi apsan melie bakrime kakketgipa ja·pangko sandie kamko ka·angna molmolanikoba on·angaha.
