South Garo Hills-ni sima ari jolo BSF dolni gari bolsa bilsi 62 ong·gipa me·chikma saksako da·al attamni bako salpakenba adita saknaaona sokataha. Gariko salenggipa driver-ni kosako pulis dolrang mokordomako ka·angaha ineba u·iatangaha.
Ia ong·a obosta Angratuli reserve forest aro Gasuapara-ni bijangchio sima ari jolni ramako re·angengmiting somoio ong·aha jean 200/1 BSF Battalion ni Bolero gari number ML05 V 0558 ong·a. Ia a·selo saknaa man·gipara Rakipara songni Bilora N. Marak ong·a aro uko sanna bannaniko on·agita ta·raken hospital-ona rimangaha ine parakataha.
Salpaka man·gipa me·chikmani ga·ake donganiko nike songni manderang ka·onange gariko dongdulangaha. Unbaksana sima ari jolo BSF dolrangni garirangko ta·rake salanina raka ja·kuko de·china aro sinjetaniko on·chinagitaba dabiangaha.
