South Garo Hills a·jao batanggimin somoirangoni rimsrukanio mongsonggipa jak donggipa Rongsrang M. Sangmako East Garo Hills a·jao Williamnagar thanani ning·o ga·akgipa Rapdikgre songoniko pulis dolrang rim·aha. Ua Nikrosh R. Marak ni depante, South Garo Hills Baghmara thanani ning·o man·gipa Gittinggre songoni ong·a.
Sangmana agreba gipin jak donggiparang chong·motan Wilban M. Sangma, Withmil S. Marak, Sengsrang Ch. Marak, Tengsrang Ch. Marak aro Aiber M. Sangmakoba jak donganina batanggimin somoio rim·aha. Sing·sandianio u·ianigitade Rongsrang M. Sangma saksa GNLA (R) ni member-ba ong·a aro GNLA (R) ni bimingko ra·e bang·a namgijagipa kamrangko ka·enga ine ma·sina man·aha. Sangmako rim·anichi da·o uamang sak 6 rim·srukanio aro denggu dakanio mongsonggipa jak donggipa dol chu·gimikko rim·na man·aha.
