Re·anggipa April 20 tariko Ballonggre ICFAI University jolo Dumper truck bolsani simsakgija salanichi me·chik chadambe baksa a·sel ong·ani bidingo Garoland State Movement Committee (GSMC), CEC H.Q, Tura raken jegalaniko dakataha. Ia a·sel ong·anio ga·akgipa chadambe ja·a samsako gimaataona sokaha aro gisiknigita namen kenjagokaniko man·aha.
GSMC dolrang ia a·selko chagronge saknaa man·gipa chadambena tangka paisanigita on·pilskaaniko dakchina, dosi dakgipako rim·china aro changgipino indakgipa a·selrangko chagrongjachina mikrakataniko on·china didiangaha. District administration, police department, transport department aro gipin department rangko ia ong·anggipa a·selko name nirikkianiko dake salni bako jrimgipa garirangni re·ruraaniko dontongatchinaba mol·molangaha.
