South Garo Hills, Baghmara ni ning·o donggipa Nengkong Chibegre songo Airtel network ko ru·uta salrangonian tik ong·e watjani a·selo bang·a neng·nikaniko jolo songdongenggipa manderang man·enga ine saksa Social Activist AZ Matsram N. Marak u·iataha. Uamangni dingtang dingtang kamrangna aro salantini kobor rangko altue ra·na man·jani a·selo neng·nikaniko man·anigin songdongenggipa manderangni badi ka·anganikoba niknagita man·aha.
Ia chasongo network an mingsa nangchongmotgipa ong·a maina pilak kamrangnan internet service ko jakkalna nangan baksana ia mobile tower ni networkrangko manderang indin jakkalgija an·tangtangni tangka paisa rangchi recharge ka·esa jakkalenga ineba Marak u·iatangaha.
Ia neng·nikaoni naljokatna aro changni chang badi ka·na nangjanagita, mobile tower ko je technical rangan jako ra·e nirokenggiparang nambata bewalo network ko wate on·chinagitaba mol·molaniko dakangaha. Unbaksana ia mobile tower ko indake kal·ake wate rogenchimode mikkangchi Consumer court o badi ka·na nangaonaba soknaba donga ineba Marak aganangaha.
