Mijal attamo A·chik Holistic Awakening Movement (AHAM) CEB H.Q. Tura ni General Secretary Clinton Marak, baksa AHAM Gasuapara Regional Unit aro Gasuapara AHAM women’s wing dolrang, Gasuapara block jolni dingtang dingtang tang·doani aro rika cho·arangni bidingo Agatha Sangma baksa golpogrike adita nanganirangko janape memorandumko uni jako on·angaha.
Skanggipao Gasuapara songo Primary Health Centre (PHC) ko ta·rake ra·bae on·chinagita Agatha Sangma na, uni party ni chalaienggipa a·dok sorkariko nirokatchinagita didiangaha. Gasuapara jolo sanna bannani cholrangko man·a bilongen neng·nikaniko man·enga aro cholgri manderang nama sanna bannaniko daknagita chel·gipa biapchi re·na man·pajae janggi tangko gimaataona sokenga ine AHAM dol janapangaha.
Unbaksana Gasuapara block ni jolo dingtang dingtang Secondary aro Higher Secondary School rang donggenchimoba, college-rang dongkujae, songadamni chatro chatrirang class-XII (HSSLC) ko matchotmane, gipin biapchi chubata gadango poraina re·angna chol man·pajae bang·an an·tangtangni poraianiko dontongnagita nangengani gimin Gasuapara-o gital Government college ko rike on·chinagitaba janapataha.
Gasuapara block ge·sa South Garo Hills block rangoni mande jelbatgipa ong·a. Mande jelgipa block ni ning·o donggipa songrangko nigrikgenchimode, Civil Sub-Divison ko man·a kragipa ong·a, maina dingtang dingtang Government office-rang Chokpot Civil Sub-Divison aro Baghmara rangona sualgrike donahani gimin, Gasuapara block ni ning·o songdonggipa manderangna bilongen neng·nikani ong·a. Manderang Chokpot aro Baghmara-ona chel·bea ramarangko rena nangan baksana ramarang namjani a·selo salsao kam matchotatna nanggipako salgittam ba salbri rangni somoiko nangenga ineba u·iatangaha. Garo Hills ni gipin a·jarangko niatgenchimode, a·ja ge·prako Civil Sub-Divison damgni ba damgitam donganiko nikna man·a, indiba South Garo Hills-ode Chokpot na agre gipin biaprango Civil Sub-Divison dongkujaengani gimin NPP ni chalaienggipa a·dok sorkari Gasuapara koba gital Civil Sub-Divison songna nanga ine Agatha Sangma baksa golpoe lekkarangko on·angaha.
Indo-Bangla sima ari jolo songdonggipa manderang bilongen neng·nike janggi tanggiparang ong·a maina gipin biaprangogita bagan bari aro gipin janggi tangani cholrang dongpajae salantian cha·a ringanina neng·nike janggitanggiparang ong·a. A·song damsa damgipin baksa bajar anti cha·grikani ba palgrik sim·grikani, International marketing ba border haat rangko sorkarirang kulie on·genchimode, Gasuapara jolo songdonggipa manderangna tangka paisanigita dakchakbeani ong·gen aro an·tangtangan saksa sakgipino pangchakgrike janggi tangna man·pagen ine aganangaha. Iani bidingo Gasuaparao ta·rakale border haat ko kulie on·chinaba mol·molangaha.
Rongsepgre songoni Rongsanggre-ona, Rongsigre songko napake re·gipako tarinagita Pradhan Mantri Gram Sadak Yojana (PMGSY) scheme rangkoba ra·bae on·china AHAM dol janapjolangaha. Ua jolo songdonggipa manderang rama namjae re·na dona neng·nikaniko man·an baksana poraigipa bi·sarangba wachi kario bilonggen neng·nikaniko chagrongna nangronga ineba u·iatangaha.
