District Football Association Tura, West Garo Hills a·jani palo kal·nagita, bilsi 14 aro bilsi 16 ni ning·o ong·gipa me·asarangna Inter District Youth League-o bakko ra·nagita re·baenggipa April 20 oni 27 tarikona pringni 9 bajioni seokaniko dakangnagita u·iatangaha.
Kal·chakram biapona pringni 8 bajio soknagita nanggen aro iano bakko ra·gipa bilsi 14 ni ning·o kal·nagita January 1, 2011 aro December 31, 2012 ni gisepo atchigipa ong·na nanggen. Unbalsana bilsi 16 ni ning·o kal·e mesoknagita January 1, 2009 aro December 31, 2010 ni gisepo atchigipa ong·na nangskagen ine parakataha.
Kal·nasienggiparang an·tangtangni Birth Certificate aro Aadhaar Card ko ra·banagita nanggen ine u·iatangaha. Kal·giparang antangtangna football kal·na jakkalgipa bosturangko ra·banagita nanggen aro ia seokaniko dakani somoio TA/DA rangko on·jawa ineba DFA-ni General Secretary Gamcheng R. Marak u·iatangaha.
