Battanggimin salrango Meghalaya Basketball Association aro District Basketball Association, Tura ni nangrime ong·atanggipa U-18 basketball trial ba porikka ra·anio seoka man·gipa sakgni chadamberang Shillong o gnigipa porikka ra·anioba chu·sokgipa ong·e Meghalaya ni palo kal·na seokako man·angaha.
Adita salrangna skang Tura ni Don Bosco College Basketball kal·chakram biapo porikka ra·anio DBA Tura nambatgiparangoni sak 6 mang kal·nagiparangko Garo Hills ni palo seokangaha. Uamangoni sakgni gnigipa porikka ra·anioba seoka man·taie, da·o April jani 26 tarikoni 30 tarikona Guragram, Haryana o ong·nasienggipa chang 67 gipa National School Basketball Games 2024 o Meghalaya a·dokni palo kal·na cholko man·aha.
Seoka man·gipa chadamberang West Garo Hills, Tura ni Jaisen M. Sangma aro North Garo Hills, Resubelpara ni Jordan G. Momin Haryana o a·dokni palo kal·e kal·susaani a·bao Meghalaya a·dokna aro Garo Hills na mikkim rasongko ra·bana jotton ka·angen.
Da·o uamang gipin seoka man·giparang baksa adita salrangna Shillong ni St. Anthony’s College o kal·susaani a·bao skianiko ra·e an·tangtangko tarisamsoanirangko dakangenga.
