Da·al salni bako Tura ICFAI University campus-o “ Find your passion, Design your career” katta bichongko done Career Counselling Programko ong·atangaha. Ia programo Tura aro Garobadha ni bida pakwatgiparangni principal rang, skigiparang, class 12 aro college rango poraienggipa chu·gimik sak 210 mang chatro chatrirang bakko ra·angaha.
Tura ICFAI University-ni Vice-Chancellor Dr. Alicia Gatphoh chatro chatrirangni mikkangchi janggi tangani ramarangko baseani aro an·tangni dakna sikkaniko ja·rike ranta ka·genchimode janggitangna cholko on·na ama ine ua aganangaha.
Kamoni neng·takgimin IAS officer Ashoke Tigidi uni chatro ong·mittingo chagronggiparangko janape janggi tangna cholko baseani bidingo aganangaha. Ua dingtangmancha chatro chatrirangko an·tangtangni dakna sikanio bebe ra·e bimchipe aro gisiko nange kam ka·angchina didiangaha.
Tura Govt college ni gitcham principal Biana W. Momin poraia skianio dingtang dingtang ramarang donganiko janapange, an·tangtangni namnikbatsranggipa poraiani a·barangko baseaniosa kusiniko man·a ine aganangaha. Unbaksana chatro chatrirangna CUET, NEET, JEE aro gipin gamchatgipa porikkarangni namgnirangni giminba talatangaha.
RBI ni gitcham Chief General Manager Beryl B. Sangma Banking Sector ni bidingo aganange dingtang dingtang cholrangni aro ma·sianirangko talatangaha. Class 12 o poraienggipa chatro chatrirangna MBA, CA, CS aro ICWA porai man·giminrangna banking sector rango janggi tangna cholrang donganiko aganangaha.
Bon·kame agananggipa ICFAI University ni Associate Professor Dr. Surajit Sen an·tangtangni jumangrangko ja·rike ramarangko basechinaba didiangaha.
