A·chik songrango bang·a neng·nikanirangko on·enggiparangna ra·chakna man·gijako parakate Puksora, Challang aro Chigitchakgre jolrangoniko A·chik manderangni bilko ra·seke sinjetaniko ra·galna nanga ine Garoland State Movement Committee (GSMC) H. Q. Tura ni Co-Chairman, Balkarin Ch. Marak aganangaha. World Indigenous Rights-o pangchake A·chik manderang an·tangtangni bilko simsake ripingna chol donga aro iako darang sorkariba A·chik manderangko neng·nikaniona galonna nangja. India-ni tarigimin niam retio A·chik ku·sikko, jatni dakbewal rikbewalrangko, a·a chiako ripingna bil on·manaha uni gimin manderangni ku·rangko pangnan je sorkariba knachake nangnikanirangko chu·sokatna nanga ine Marak parakangaha.
Mikkangchi rakbegipa neng·nikanirangko chagrongnaba donga ine Marak A·chik a·songna re·mikkangna nangenganiko janapate manderangna didianiko on·angaha. Mongsongbate A·chikrangni Matgrik Pa Sonaram R. Sangma-ni jumang Garoland State-na krenge kam ka·na nangenga ine Marak parakangaha. Garorang chengonin Assam a·dok ong·na skangan songdong a·chae janggi tangbaaha. Apsandaken Khasi Hills-oba chengonin A·chik jat songdongbaaha, indake ong·genchimoba da·o uamangko sason ka·gipa dilgiparang mande ra·gija uamangni bilko gimaate ra·sekdrana am·enga ine Marak janapataha.
Iarang pilakko niate, A·chik manderangni daka rika aro ku agana donggipa biaprangona kingking gimikna chanchisamsoe Garoland State ko A·chik manderangni songdongipa gimikkon man·e, New Delhi-o Memorundum ko on·taiaha ine Marak parakangaha. Ia dabianirangko bimang pil·atanio chu·sokna man·agita apsan ku·rang on·e bil jakko de·e, A·chik dedrang sudrangrangna gamchatgipa gamko donangna sakantiko krimkro ong·china Marak didiangaha.
