Re·anggipa bilsio Masterchef India season 8 o bakko ra·e gnigipa gadango chu·sokbagipa ong·e A·chik jatna mikkim rasongko ra·bagipa Nambie Jessica Marak da·al salni bako National People’s Party (NPP) o bakrime kamko ka·nagita party o napeaha.
Masterchef Nambie West Khasi Hills Athiabari songoni ong·a. Iani gisepon da·al salo re·baenggipa Lok Sabha election-na West Khasi Hills o campaign ka·anio Nambie Marak ko NPP nigita Chief Minister Conrad Sangma ni jakchi rimchaksoaniko dakangaha.
Nambie ni agananigitade uni changa sapani aro dakna sikanirangko mande ra·an baksana uko ra·donagita dingtang dingtang cholrangko on·ahanina, NPP dol baksa da·al salo bakrimangaha ine aganangaha. A·dokni Chief Minister Conrad Sangma aro party ni dilgiparang uko mande ra·bee mikkangchi nambata gadangona de·dona aro song nokko ra·dona niksamsoe miksonganirangko chu·sokatna kam ka·na ja·ku de·anian una ka·dongsoaniko mesokani ong·a ine ua jinmana parakangaha.
