South West Khasi Hills Zone, AHAM dolrang Education Minister Rakkam Sangmana, a·jao skia poraiani gadangko namdapatna aro cholrangko ra·bana nangenggiparangko janapate uamangni dolni President Crownbatter T. Sangma jinmani palo chittiko sedoataha.
AHAM dolrang jolo poraienggipa bi·sarangni tang·doanina Khonjoy, Moheskola, Ranikor aro Puksora songrango Auditorium cum Library ko ra·bae on·china mol·molataha. Iachi bi·sarangni poraia skianina agreba jatni dakarikaniko, songsalo skie ra·aniko aro library rango poraianichi u·i ma·sianiko bariatna dakchakani ong·gen ine parakangaha. Jolni bi·sarangni poraia skiao neng·nikanirangko namdapatna Khonjoy Secondary Schoolko, Higher Secondary School ni gadangona ra·doatchina janapataha. Unbaksana, uamangni batanggimin salrango dabienggipa, Khonjoy aro Moheskola o Government College ko rikani bidingoba Education Minister ko gisik ra·ataie janapataha.
South West Khasi Hills-o skul bi·sarang salantio km 5 ba 6 chel·bea ramarangko ja·achi re·rurana nange neng·nikaniko man·engani gimin skul bi·sarangko salna garirangko on·china mol·molataha. Minggipin uamang Right to Education Act 2009 o ku·tangchi skina nanganiko niamrang tarimananiko janapate, Primary skulrango Garo ku∙sikchi skigiparangko rakkichina aganangaha. Bon·kame, AHAM dolrang jolo primary skulrangni nosto ong·e dongenganiko nike pilak primary skulrangko taridape ba namdapate on·pachinaba didiangaha.
