Mijal salni bako Congress dolrang North Garo Hills, Adokgre ona re·ange re·baenggipa Lok Sabha election 2024 na campaign ka·engmitingo Dr. Mukul Sangma ko Congress dolni tangkarangko bon·e cha·minoke katgipa ine Saleng Sangma matnange aganangaha. Ia kattarangko Saleng Sangma, batanggimin salrango Dr. Mukul Sangma ni uko tangka donggijagipa candidate ine agananina aganchakangskaaha.
Dr. Mukul Sangma, Congress ni tangka paisa donga aro donggijako namen ma·sigipa ong·a, maina uan ru·uta bilsirangna party ko dilange tangkarangko bon·e an·tangna ra·aha ine Saleng Sangma aganangaha.
Manderangna Congress dolni miksonganirangko talatangengon, ia election-o Kristian toromo bebera·giparangna sinjetaniko ra·baenganina an·ching dakgriksonagita nangenga ine Saleng Sangma aganangaha. BJP dolrangni Manipur o sason ka·e gilja nokrangko pe·e galagita Garo Hills oba apsanko dakgenchimoba NPP nan pu·ontokaigenma ine Sangma sing·angaha. Mikkangchi ku·cholsan dakgrikna, A·chik jatko a·gilsakna u·iatna aro dakarikanirangko tangkame rakkina, ia chango jaksirangko sikdepna nangenga ine Sangma aganangaha. Iarangko niatjagenchimode an·chingba ba·ra katome katna ba army camp rangni ning·o refugee ranggita dongna nangnaba donga ineba Sangma agandapangaha.
