Don Bosco College Tura ni Internal Quality Assurance Committee (IQAC) aro NEHU Shillong apsan bakrime, ‘Higher Education in Meghalaya and Implementation of the New Education Policy in colleges in Garo Hills’ katta bichongo pangchake salsana tom·e chanchirimaniko ong·atangaha. Ia tom·aniona Garo Hills ni college-rangoni Principal rang, NEP/IQAC Co-ordinator rang chu·gimik sak 50 mang bakko ra·angtokaha.
Ia tom·bimonganiko Tura DBC ni chatro chatrirangni ka·sroke ring·anichi a·bachengangaha aro DBC ni Principal Rev. Fr Bivan Rodriques Mukhim sokbagiparangna rimchaksoani kattarangko aganangaha.NEHU Shillong ni Controller of Examination, Prof. Sumarbin Umdor, NEP ni bidingo Higher Education ba chubatgipa gadango poraianiko, Garo Hills ko dingtangmancha done aganangaha aro skigiparangna adita nanggipa u·ianirangko talatangaha.
NEHU Tura ni Campus Director, Prof. Sujata Gurudev, Northeast a·dok damsa songdongkamgipa jat ba manderangni dakbewal rikbewal donggipa ong·ani gimin NEP ko ra·gatna mingsa namgipa chol ong·a ine aganangaha.
NEHU Tura ni Dept of Rural Development and Agricultural Products, Associate Prof. Dr. Binu Matthew, NEP ni ja·pang ja·dilko talatangskaaha. Don Bosco College Tura ni Prof. Dr. Barbara S. Sangma, chatro chatrirangnasan ong·aigija mande sakantinan apsan ku·monge kam ka·e dingtanganiko ra·bana didiangskaaha.
