Garo Hills ni adita me·a aro me·chik chadamberangko mikkang jao Indore o ong·nasienggipa chang 74 gipa National Junior Basketball Championship 2024 o bilsi 18 ni ning·o ong·giparangna Meghalaya dolni palo kal·nagita porikka ra·e seokaniko da·al salo Tura Don Bosco College basketball kal·chakramo ong·atangaha. Ia porikka ra·anio nambatgipa aro kal·na sapbatgipa chadamberangko seokangaha.
Garo Hills ni dingtang dingtang bakrangoni sak 29 mang chadamberang re·bae da·alo bakko ra·angtokaha jeon sak 21 me·asa aro sak 8 me·chikrang sokbatokaha. Ia somoio uamang an·tangtangni changa sapaniko kal·e mesokangan baksana U-18 Meghalaya basketball dolo seokako man·a gisiko nange kal·na skaniko mesokangaha. Uamangni changa sapaniko nigrike seokaniko adita coach aro scout rang dakdilangaha.
Sokbagipa sak 29 chadamberangni kal·anirangko aro changa sapaniko niangani ja·mano chu·gimik sak 6 chadamberangko Shillong o minggipin porikka ra·anio bakko ra·na seokangaha. Uamangoni sak 4 me·asa aro sak 2 me·chik chadamberang seokako man·angaha. Me·asa bi·sarangoni seoka man·giparang East Garo Hills ni Asim Jakrikra D. Marak aro Milo Arengh, West Garo Hills ni Jaisen M. Sangma aro North Garo Hills ni Jordan G. Momin ong·a. Me·chik chadamberangoni West Garo Hills ni Tengsilchi B. Marak aro South Garo Hills ni Mechira N. Sangma seokako man·angaha
