April 4 tariko NPP ni National President, Conrad K. Sangma, Arunachal Pradesh-ona re·angmiting somoio unbaksa re·chapanggipa chel·chakgipa sipai dolrangko ja·rikpaanggipa Badri Rai Company ni gari bolsaoniko crore 1 tangkarangko man·aniko, NPP dolrang maming bak dongja ine jegalataha. Ia ong·a obosta Longding-o NPP dolo susaenggipana chakpana Conrad Sangmani re·angmiting somoio ong·aha.
Indake pulis dolrangni nambate am·sandianiko dakani ja·mano garini nokgipa Badri Rai Company ni Executive Director, Harshvardhan Singh ong·a ine u·inagita man·angaha.
Unbaksana NPP dolni ku·watimgipa H. M Shangpliangni aganigitade, tangkarangko man·gipa gari Chief Minister Conrad Sangma baksa re·angpagipa ong·ja ine parakataha. Chief Minister ko gatenggipa aro ja·rikpaenggipa pilak garirangko election ni code of conduct-o pangchake nirikie am·sandianirangko dakchengaha aro ua somoio maming bosturangko man·jaha ineba Shangpliang aganangaha.
Apsandaken Kanubari check gate o nirikianioba party ni National Presdient, National General Secretary aro gipin garirangko FST, SST aro pulis dolrang am·sandiangaha. Pulis rangni garikoba dongdipate am·sandigenchimoba mamingkon man·jaha ine ua talatangaha. Ian kobor ra·timgiparangni talchenggija parakatanisan ong·aia aro iani bidingo party ni National President ko bak dongataniara kakketgipa ong·ja ine Shangpliang agandapangaha.
