Garo Hills ni dingtang dingtang biaprangoni sak 16 chadamberangko Maharashtra, Mumbai o Elenti Pvt. Ltd company o kam ka·na rimange chu·gimik nirok simsakaniko on·gen ine togigipa Pijush R. Marak ni kosako ACHIK Krima Council ni Asst. General Secretary Changte Arengh Baghmara Pulis thanao mokordoma ka·angaha.
Pijush Marak ni chadamberangko Mumbai songjinmaona rimange gale donbaani ja·mano company uamangko nokkolgita dormaha on·gija jakkalenga ine rimangako man·gipa saksa Sengbar A. Sangma ni ku·siliting gita golpoatanio u·ina man·aha. Iani bidingo duko ga·akenggipa chadamberang uamangni neng·nikanirangko Pijush Marak na janapahaoba uamangko noktangona rimbapilna maming ja·kuko de·jaha ine Sengbar Sangma ni u·iataniko ACHIK dolrang parakataha.
Pijush Marak Assam Lokhipur ni ning·o ong·gipa Pandoba Remakona songoni ong·a aro uko company o agent ni kamko ka·enga ine chanchipa gnang aganangaha.
Iani bidingo Garo Hills ni chadamberangko noktangtangona rimbapilna nanggipa ja·kurangko de·china didiangan baksana dosi donggipa mandeko niamo pangchake kragipa sastiko on·chinaba ACHIK Southern Zone ni Asst. Secretary jinmani palo mol·molataha.
