Garo Hills a·jarango re·anggipa assembly election 2023 o TMC dol pilak susagiparangni gisepo bang·bate vote man·giparangoni gnigipa ong·aha aro ia chang NPP baksa TMC party an bil·tinggrike susaani ong·taigen ine Zenith Sangma, Gambegre constituency ni ning·o campaign ka·ani somoio aganangaha. Pilak manderangan ia chango NPP ni Agatha Sangma-ko dingtangatna nangniktokenga aro ia dingtanganiko ra·bana TMC ko seokachisa man·gen ine Sangma aganangaha.
Re·anggipa chango TMC dolna 1.95 lakh mang manderang pu·onaha, BJP dolrang gnigipa ong·aha aro Congress dolrang hajal 65 vote kosan man·a amaha ine Zenith Sangma parakangaha. Ia chango chegipa ong·na chu·gimik lakh 2.5 vote rangko nangenga aro Congress baksa toatgenchimode, TMC dol changgitamna bate dongenga ine Sangma janapangaha. Ua manderangni vote rangko gimaatgija TMC na pu·onchina didiangan baksana Congress dolni Saleng Sangma ia chango lakh 2.5 ona sokdoatna man·genma ine sing·doangaha. Agatha Sangma ko dingtangate Saleng Sangma ko seokgenchimode ong·gramanisa ong·aigen ineba Zenith Sangma agandapangaha.
1
