March 27 tariko, Tura District Auditorium-o, World Theatre Day ko man·ianio ‘Du·kon’ dakmesokaniko A·chik Theatre dolrang dakmesokangaha. Ia programko a·bachengani bako, NEHU Tura, English Departmentni chatro chatrirang bilsi sokgija oko keani, nokdango kajia golmal ong·ani aro pekatgipa bosturangko jakkale nosto ong·ani bidingo dakmesokangaha. Uamangni dakmesokaniara nokdangrango dingtanggrikanirangko maidake janggi tanganichi nambatatna man·aniko u·iatnagita dakmesokangaha.
Ia World Theatre Day ko ong·atgipa dolrang, pilak dakmesokanirangko ninagita tangkarangko ra·gija napna on·ani gimin bang·a manderangni nina re·batokaniko nikangaha.
‘Du·kon’ ko dakmesokanio nigiparangko ka·dingatani aro gisik nangbeanikoba ra·baaha maina ia dakmesokaniko changgipa sapgiparangni cholon bewal, biaprangko tariani aro stage-ko nitobee teng·atanirangchi dakmesokaniko ga·subatataha. ‘Du·kon’ ko dakmesokaniara ia chasong gitalni somoio manderangna nangchongmotgipa ka·saani aro meli nangrime janggi tanganiko gimaate gam jin aro rasong rabaknasan rikaniko miksongani ong·a. Unbaksana ia dakmesokanichi chasong dambe aro chasong gitchamrangni janggi tanganio man·gnirangko chu·ongnikgija man·dapna rikanikoba mesokani ong·a.
A·chik Theatre dolrangni dakmesokgipa ‘Du·kon’ ara pagitcham ma·gitchamrangni aganritingbaanigita Garo Hills o donggipa mingsa bolpang ong·a. Ia Du·kon o manderang ga·dapmangenchimode gisikko ja·guata ba jada sikate maming miksonga gri re·brangata ine A·chikrangni bebe ra·bagipa ong·a.
Ia nambegipa ‘Dukon’ dakmesokaniara manderangna namen ning·tubee chanchina nanggipa kattarangko dakmesokanichi u·iatna miksongani ong·a jeon ia namgipa dakmesokanina manderang kusi ong·bee mittelpilanigita chadenge jakparangko doke mande ra·ani chinko mesokangaha.
