Re·baenggipa Lok Sabha election o susanasienggiparangni nomination file ka·angani ja·mano, uamangni affidavit ka·anio pangchake chu·gimik gamjinrangko parakataha.
Pilak susanasienggiparangni affidavit file rango ra·chakani ja·mano Meghalaya a·dok gimiko Congress dolni Vincent H. Pala man·e cha·batgipa ong·aha. Pala ni jikgipa baksa chandime uni chu·gimik gamjinko gong 100 crore mang bata ine parakataha. Uni gamchatgipa gamjinrang jekai bank account rang, gari gorarang aro sona ruparangko man·gope gong 1,59,27,412 mangni ong·a. Uni jikgipa Dimorine Tariang ni gamjinrang chu·gimik gong 91,50,217 mang dong·a. Unbaksana uamang sakgnio dingtang dingtang a·a chiarang aro nok jamrangba donga ine parakataha.
Tura-o susanasienggiparangoni NPP ni Agatha K. Sangma man·e chabatgipa ong·aha jeon uni chu·gimik gamjinrang dingtang dingtang bank account-rang, gari gorarang aro sona ruparangko man·gope chu·gimik gong 52,78,453 mang ong·a. Sangma-ni nok jamrang aro a·a chiarang gong 2,87,17,525 mang damni ong·a. Uni segipa Patrick Salgira R. Marak ni gamjin, bank account aro Volkswagen Taigun gari baksa gong 31,50,578 aro gong 7,87,500 mangni dam ong·gipa a·arang donga.
Trinamool Congress ni Zenith Sangma, uni bank account-rang, garirang jekai Hyundai Creta, Toyota Fortuner aro Mahindra Thar baksa chandime chu·gimik 48,66,730 mangni gamrang donga. Sangma-ni a·a chia aro nokjamni dam gong 4.50 crore mangni gita donga ine ma·sina man·angaha. Uni jikgipa Sadhiarani Sangma ni bank account-rang, gari gorarang jekai Mitsubishi Pajero, Hyundai i-10 Grand, bolgni JCB aro bol gittam truck rangko man·chape chu·gimik dam gong 38,13,948 mangni gita dong·a ine parakataha.
Congress Candidate Saleng A. Sangma, uni dingtang dingtang bank account-rang, garirang jekai Toyota Fortuner, Mahindra Thar, Mahindra Scorpio aro Jeep Wrangler Rubicon rangko man·chape gong 1,80,49,264 mangni ong·a. Pilak susanagiparangni gisepo tangka paisa ba gamjinrangoni komibatgipa Independent ong·e chakatenggipa Laben Ch. Marak ong·a ine u·ina man·aha.
Shillong o susaenggipa NPP ni Dr. Ampareen Lyndoh ni gamjinrang gong 30,06,159 ong·a aro a·a chiarangni dam gong 1.10 crore mangnigita donga, unbaksa uni segipa Fantin J. Lakadong ni gamjinrang gong 26,97,013 mangni donga ine parakataha.
Independent Candidate Lakhon Kma ni gamjinrang gong 75.64 lakh mangnigita donga aro uni jikgipa Rima Meliza ni gamjinrang gong lakh 7 mangni ong·a ine parakataha. Unbaksa a·a chiarang chu·gimik gong 4.25 crore rangni dam donga ine ma∙sina gita man·aha.
VPP candidate Ricky A J Syngkon ni gamjinrang gong 43.78 lakh aro a·a chiarang chu·gimik 87.50 lakh mang donga ine u·ina man·aha. Bonkame, UDP candidate Robertjune Kharjahrin ni gamjinrang gong 19.26 lakh aro uni a·a chiarangni dam gong 16.87 lakh mangni gita dong·a. Unbaksa uni jikgipa Ibameri Lyngdoh Marshilong ni gamjinrang chu·gimik gong 24.74 lakh mangni dam donga ine parakataha.
