Meghalaya a·doko obostarang namgijaniko angna bang·a manderangan duk ong·e agantokenga aro anga an·tangba re·anggipa bilsi bongao aro 2023 election ja·mano sorkari maidake a·dokko chalaienga gimikkon nirikkie dongenga ine TMC dolni dilgipa Dr. Mukul Sangma da·al salo Zenith Sangmani nomination file ka·ani somoio aganangaha. A·dokni manderang namen jajrenganiko man·enga, sorkarini kamrangna uamangni dedrangna cholrang ong·katdapaba dongja aro dal·a gadango poraie matchotgipa chadamberang kamgri ong·e dongenga ine Sangma kobor ra·timgiparangna parakangaha. RTI rangko ka·e parakataniko manderang nike duko ga·akenga aro indita bangbanggipa kamrang donggenchimoba maina uarangko gapatjaenga ine manderangni uo sing·doanikoba Sangma parakangaha.
Dingtang dingtang poraichakani a·damrangko jekai Medical college, College of Architecture & Urban planning, technical, professional aro gipin university rangko ma·mong sorkarini tangka paisarangchi ra·baaha, uarang mai ong·tokaha ine manderang ango sing·enga ine Sangma aganangaha. Iarango hajalni hajal dedrangrang kam ba cholrangko man·a amachim ine Sangma parakangaha. Ma·mong sorkarini tangkachi ra·bagipa Medical College ko a·bachengatna man·gija maina bon·chipe donenga, sorkari tangka dongjama ineba Sangma sing·doangaha.
Iarang pilakkon nie dongengon, ma·mong sorkarioni jegita scheme rangko on·atgenchimoba, a·dokko nirokenggiparang kakket ong·e kamrangko ka·jaode chu·sokna man·ja ine Sangma aganangaha. Iarangni a·selosa manderangni Lok Sabha election-o susana uko didigenchimoba, Delhi chi re·ange a·dokni obostarangko nigamate dongana bate a·doktango donge namgijagipa kamrangko namdapatna ja·ku de·na miksongani gnang susajaha ine Sangma agandapangaha.
