Lok Sabha election 2024 o All India Trinamool Congress oni Tura-ni biapo susanasienggipa Zenith Sangma da·al salo WGH a·jani Deputy Commissioner aro returning officer, Jagdish Chelani-ni mikkango nomination file ka·angaha. Ia somoio Sangma-na bakrimpaaniko mesokna uni adagipa aro gitcham Chief Minister Dr. Mukul Sangma, Dadennggre-ni MLA Rupa Marak, Rajabala ni MLA Mizanur Kazi, GHADC ni adita MDC rang aro una chakpagipa manderangba re·bae bakko ra·angtokaha.
Rangsakona ni gitcham MLA aro TMC doloni susana am·enggipa Zenith Sangma, Tura o MP na susana biming seokako man·e batanggimin salrangoni Garo Hills ni bang·a biaprangona wenna a·bachengaha. NPP ni Agatha Sangma, Congress ni Saleng Sangma aro Independent ong·e susanasienggipa Laben Ch. Marak ni ja·mano Sangma bon·kame an·tangni bimingko segate da·alo nomination file ka·angaha.
