BCCI ni All India Senior Men’s Selection Committee, re·baenggipa April 8 tarikoni May 2 tarikona Guwahati songjinmao camp ko ong·atnasigipao bakko ra·na Meghalaya a·dokni sak 9 Cricket kal·giparangko seokako man·gipao A·chik saksa Dippu Sangmaba seokako man·anga. Dippu Sangma baksa bangki sak 8 seokako man·giparangara Akash Kumar Choudhury, Swarajeet Das, Jaskirat Singh Sachdeva, Abhishek Kumar, Ram Gurung, Kishan Lyngdoh, Raj Biswa aro Aryan Borah ong·a.
Ia sak 9 seokako man·giparangara 2023-24 bilsio uamangni kal·susaatgipa Syed Mushtaq Ali trophy (Senior Men’s T20), Vijay Hazare trophy (Senior Men’s one day) aro Ranji trophy (Senior Men’s first class) o kal·anirango nambatgiparang ong·anio pangchake seokako man·angaha. Batanggimin somoio plate group kal·anio skanggipa changna Meghalaya a·dok final ona doange rakbegipa aro changgipa sapgipa Hyderabad dol baksa susaangna man·aha. Sak 9 seokako man·giparangara ia bilsio gipin dolrang baksa kal·a changantio chegipa aro nambate kal·giparang ong·angaha.
Pilak tournament rangko kal·anio Dippu Sangma ni nambee robol goanichi doltangni kal·rimskarang pangnan ka·dongna man·ronga maina ua kal·a gimiko wicket 17 rangko ra·angna man·angaha. Indake batanggimin somoio nambee kal·anichi ia chango nambata gadango kal·susanagita namgipa cholko uamang man·angaha.
