Mijal salni bako North Eastern Hill University (NEHU) Shillong campus ning∙ao Holi manianio, NEHU Students Union (NEHUSU) baksa Rashtriya Swayamsevak Sangh (RSS) aro Akhil Bharatiya Vidyarthi Parishad (ABVP) nangrike kajia golmal ong∙angaha. Koborko man·soanigitade mijal salni 12:30 bajimangni somoio NEHUSU ni adita member-rang NEHU campus ni ning∙o indakgipa manianirangko aro politics kal·nagita niam dongja ine beng·ani ja·man kajia golmal ong∙nagita a∙bachengaha. Ia somoio RSS aro ABVP baksa nangrike NEHUSU ni Vice President Esterson Sohtun adita jokkom ong∙aona sokaha ine NEHUSU ni dilgiparang parakataha.
Ia obosta ong∙ani kosako NEHUSU ni Vice President, sak 200 RSS aro ABVP member-rang niamgri NEHU campus ning∙ona Holi maninagita napaha ine janape Mawkynroh police outpost-o badi kado∙angaha. Uni badi ka∙anio Kamlesh Singh, Amit Tripathi aro Anubhav Pandey uko doknagita a∙bachengaha ineba Sohtun janapangaha.
World Organisation of Students Union (WOSY) ni dilgipa Sumarlin L Mawlong ni agananigitade, NEHU o Holi maninagita University ni dilgiparango bi·chenganiko dake dingtang dingtang biaprangoni chatro chatrirangko, ripengskarangko aro nama sikaniko on∙giparangko okame manianiko dakengachim ine janapangaha. Ia manianio RSS aro ABVP nigita maming bak ra∙ani dongjan baksana Singh, Pandey aro Tripathi ua somoio bako ra∙anirangkoba dakja ineba Mawlong janapangaha.
Ia kajia golmal NEHUSU ni Vice-President uni adita ka·rimska baksa re∙bae uamangni manimitting somoio adita chatrorangko doka satanirangko dake kajia golmalko a∙bachengaha ineba Mawlong aganangaha. Uandake Mawlong NEHUSU ni badi ka∙aniko jegale uni kosako bikpil badi ka·doskaanikoba dakangaha.
Ia kamko ka∙aniara jatsa jat gipinko baseani aro NEHU ni chatro chatrirangni gisepo jatsa jatgipin baksa ma∙ekgrike donganiko ra∙baani kam ong∙a ine Mawlong agandapangha.
