Lok Sabha election 2024 o NPP doloni susanasienggipa Agatha Sangma da·al salo WGH a∙jani Deputy Commissioner Jagdish Chelani-ni mikkango nomination file ka·angaha. Sangmana chakpaaniko on·agita NPP ni bang·a dilgiparang, party ni National President Conrad Sangma, State Vice-President Prestone Tynsong, PHE Minister Marcuise Marak, Power Minister AT Mondal, NPP ni gipin MLA rang aro chakpagiparangba re·bae bakko ra·angaha.
Ia Lok Sabha election-ko re·baenggipa April 19 tariko ong·atanggen jeon NPP ni Agatha Sangma, TMC ni Zenith Sangma, Congress-ni Saleng Sangma aro Independent ni Laben Marak ni gisepgriko susaaniko dakanggen. NPP ni Agatha Sangma da·o dipet changgitam susae changsamangba election o sirika dongkuja aro a·doko NPP dolan sorkarikoba rikengani gimin gipin susagiparang rakbate kam ka·na nangao ga·akenga.
