3 gipa North East Games 2024 o kal·susaanio adita medal rangko man·genchimoba, medal table o Meghalaya a·dok 7 gipa biapona tang·onangskaaha ine niknagita man·aha. Ia susaaniko saldokna Nagaland a·doko an·saobee kal·angaha. Megahalaya a·dok ge 2 Gold, ge 12 Silver aro ge 41 Bronze chu·gimik ge 55 medal rangko man·e a·dok dam 8 medal man·batgiparangoni 5 gipa gadango ga·akna bang·jagenchimoba ge 2 Gold ni a·selo Tripuara a·dokna mangmangsan batnagita man·aiaha.
Me·chik dolni bon·kamgipa basketball kal·susaanio bil·tinggrike kal·genchimoba Sikkim a·dok 61 point ko man·e Meghalaya a·dokko amataha. Me·chik dolni Athletic kal·susaanio Bandasharai Marwein, Ibanriakor Lyngkhoi, Claire Jones Jala Kharbhih and Barisha Khymdeit ge 2 gold baksana silver medalrangko man·aha. Apsan daken me·asa dolni Kresstarjune Pathaw, Knerlang Phawa, Iohborlang Nongspung aro Dabit Dkhar bronze medalko man·baskaaha.
Lawn Tennis kal·susaanioba Wankhraw Wahlang Nongrum aro Enrick Suchiang bronze medal ko cheaha. Archery ba chri gosusanio ge 2 silver aro ge 1 bronze ko cheaha. Me·chik dolni Recurve kal·susaanio 2 gipa baipo chenagita man·aha unbaksana Recurve mixed dolni Mukesh Tamang aro Navidisha silver medal ko chebaskaaha.
Me·asa dolni recurve kal·susaanio Larilang Lyngdoh, Devraj Mohapatra aro Amebalaker Wanniang bakko ra·e bronze medal ko cheaha. Bon·kame Belt Wrestling me·asa dolni kg 60 ni ning·o ong·gipa kal·susaanio Romeo Songthiang silver medalko aro me·chik dolni sak 2 jean Lorenza Songthiang and Sany Khyriemmujat ge 2 bronze medalko chenagita man·skaaha.
