Ri-Bhoi a∙jani sima ari jolni Maikhuli songo Assam sorkari napdrabae biaprangko ra∙sekna amanirangko dakenga ine jolo songdongenggipa manderang uamangni suk ong∙gijaniko parakataha. Songni meaparang jerangan Maikhuli songni Senior citizen rang bang∙a somoio ia ong∙enggipa obostarangni gimin Meghalaya sorkariko grongenchimoba ia biaprangni bidingo maming ja∙ku deanikon dakjaenga ine uamang u∙iatangaha.
Indakgipa obostarang ong∙na skangan u∙iatsogenchimoba bang∙bata somoion obosta ong∙ani ja∙manosa a∙sel ong∙gipa biapona Meghalaya pulis dolrangni sokbaaniko niknagita man∙ronga. A∙sel ong∙ani somoio Assam sorkarinigita chu∙gimik pulis dolrang jekai SP, DSP aro IAS ni gadangni dilgiparang re∙bae nirokaniko dakronga indiba Meghalaya a∙doknigitade pulis ni SI san sokrongaia ineba songni manderang suk ong∙gija parakataha.
Ia sima ario so∙sojengjeng ong∙aniko namgrikatna Meghalaya aro Assam sorkarini kam matchotatna skangan Assam pulis rang re∙bae Mahatma Gandhi National Rural Employment Guarantee Scheme (MGNREGS) nigita ka∙gipa fishery pond ni signboard ko pee galanganiko niknagita man∙aha.
Ia obostarangko nike Jirang constituency ni MLA Sosthenes Sohtun a∙dokni Chief Minister Conrad Sangma na u∙iatangaha aro a∙jani Deputy Commissioner aro Kamrup ni dilgiparang baksa golpogrike ia obostaoni naljokatna kamrangko ka∙angaha ineba u∙ina man∙aha. Gitcham signboard ko Assam a∙dokni pee galanganina gitalgipa signboard ko songnagita Kamrup ni offcialrang songe on∙a ku∙chakangaha ine Sohtun u∙iatangaha.
