Re∙anggipa March 20 tariko Akhilesh Singh Chauhan ko Karukol Rongdik o rikenggipa dolongoniko rim∙srukanggipako Siju Police Station o koborko man∙e, pulis dolrang South Garo Hills a∙jani dingtang dingtang biaprangoniko am∙sandianiko dakangaha. Ia a∙sel ong∙ani salgipinon rim∙sruka man∙gipani nokdangoniko lakh 50 tangkarangko dabianiko dakangaha aro salgittamni gisepo tangkako sokatjagenchimode uamang Akhilesh Singh Chauhan ko so∙otna ka∙mikkenataha.
Ia am∙sandianiko dakahaon sakbri manderangni bak donganiko u∙ina man∙aha ine pulis dolrang parakataha. Rim∙srukanio bak donggipa manderang South Garo Hills a∙jani Durabanda Songgital songoni Albesten D. Sangma ni depante Wilban M. Sangma (bilsi 30), Upper Dosogre P.O. Mindikgre songoni Sotin M. Sangma ni depante Withmil S. Marak (bilsi 29), Chandigre Chokpot songoni Jenjing Ch. Marak ni depante Lathin M. Sangma aro Gittingbibra songoni Nikgros R. Marak ni depante Rongsrang M. Sangma ong∙a ine ma·sinagita man·aha.
Upper Dosogre songoniko March 22 tarikni attamo pulis dolrangni am∙sandianiko dakon, Chauhan ko maming saknaata gri jokatna man∙aha jeon sakgni bak donggipa manderang chong·motan Wilban M. Sangma aro Withmil S. Marak ko rim∙nagita man∙aha. Rim∙sruka man∙gipa mandeni nokdang dosi dakgiparangna tangka gong·saba gamnagita nangjaha ineba u∙iatangaha. Ua manderangoniko silchidare ge·sa aro mobile phone ge·gnirangkoba pulis dolrang man∙aha. Pulisrangni agananigitade ia rim·srukanio bak donggipa sakbri manderangara batanggimin somoirango South Garo Hills ni bobil dakgipa dolrang baksaba jak donga ineba u∙iatangaha.
