East Garo Hills Rongjeng songo songdonggiparangoniko Garo National Liberation Army-Regroup (GNLA-R) dolni bimungo tangka paisarangko dabianiko dakangaha ine u∙ina man∙aha.
Re·anggimin somoio GNLA-R dolrangni bimungo Facebook page rangko chalaigipa mandeko rim·aha aro rim·a man∙gipa mande an·tangan ua pageko manderangoniko tangka dabina gita jakkala ineba ku·chakaniko dakangaha. Indake ong·engon apsan bimungon March 18 tariko Rongjengoni saksa mandeniko u·ina man·gijagipa number oni call ka·ate tangka dabianiko dakangaha jekon on·jagenchimode adita ka·mikkenatani kattarangko aganataha.
Indakgipa ka·mikkenataniko man·e ua mande apsan salon Rongjeng Police station ona re·ange badi ka·doangaskaaha. Ia koborrangko man∙soe EGH pulis dolrang ta∙raken am∙sandianirangko dake saksa call ka·atgipa mandeko ma·sina gita man·aha. Re·anggipa 21 tariko dabigimin tangkarangko ra·na gita re·bamitingo Rongjeng Ambre A·dingni saksa bilsi 32 ong·gipa Predickson N Sangma ko Rongjeng Reseve Forest-oniko pulis dolrang changdule rim·na gita man·ha. Apsan daken ru·utgija somoini gisepon Nongchram Dekmim songoni bilsi 33 ong·gipa Setbingstar D Shira koba joljol rim·na gita man·aha. Ia dolni memberrangko am·sandianirangko dakangkuenga ine EGH ni SP A S Rynjah aganangaha.
Mikkangchi indakgipa ka·mikkenatani aro tangkarang dabianirangko knagenchim ong·ode sepangbatgipa police station ona re·ange koborko on·chinagita Pulis dolrang didiangaha aro kobor on·timgipa mandeni bimungko uamang parakatgija done boksis rangko on·a gitaba District Police Chief manderangna u·iatangaha.
