All Garo Hills Trained Electrician Association (AGHTEA) ni chang 10 gipa bilsini tom·bimonganiko da·al salni bako Tura District Auditorium Hall-o ong·atangaha. Ia tom·bimonganio dingtang dingtang Unit-rangni dilgiparang baksana memberrangba re·bae bakko ra·angaha. Indake uamangni tom·e chanchirimanio adita dakna nanggnirangko ra·gate jinmaan ra·chakaniko dakangaha.
Skanggipao a·palchini Garo Hills-ona niamgri napdrabae wiring ka·enganiko aro contractor-rangni niam gri a·palchiniko rimbae bijolini kamrangko ka·atenganiko champengnagita tik ka·angaha. Indake Garo Hills-ni skie ra·mangimin Local Trained Electrician Association-ni manderangko jakkalpachina aro association ni ID Card rangko am·sandichengesa bijolini kamrangko ka·atchinagita contractor-rangko, private company rangko aro Govt. Department-o kam ka·enggipa Officer-rangko AGHTEA mol·molangaha. Unbaksana ia chanchie tik ka·giminrangko Association-ni dongimin niamo pangchake kamrangko ka·anggen ineba AGHTEA ni President Justine T. Sangma janapatjolaha.
Tura-o Electrical License Office-ko man·aoni bilsi 45 ong·pilomangba, license-ko Shillongchi renew ka·na wataton, Turaona sokbapilna ja 5 ba ja 6 rang nanga aro an·tang renew ka·na re·anggenchim ong·ode re·a doani, cha·a ringani koros bang·e bon·a nangani gimin indakgipa neng·nikanirangko naljokatna license-rangko renew ka·na man·agita chu·gimik Tura-ni Electrical Inspector-na bilko on·chinaba President Justine T. Sangma, Chief Minister-na Memorandum on·anggiminko ta·rakale niatpachinaba mol·molangjolaha.
Una agreba 2019 aro 2020 bilsio Soubhagya project-ko Onycon Infra LLP-ni ning·o sub-contract ka·e cha·giparangni tangka paisarangko da·alonaba man·kujaengani gimin company-rangni kosako raka ja·kurangko de·angskagen ineba President mikrakatani kattarangko aganangaha.
