NEHU Tura campus o, game ge·e cha·giparangna uamangni ge·gimin me·su samjakrangko naljoke rakkina samrangko simsake aro name sataniko aro gital chasongni cholrangko jakkale nirokani bidingo awareness programko ong·atangaha. Ia workshop-o samrangko breani korosrangko komiate joltango donggipa bol wa·arangoniko man·aigipa samrangko jakkalaniko manderangna u·iatna miksonga gnang ong·atangaha. Ia programko NEHU Tura campus ni Agri Business Management & Food Technology (ABMFT) aro Institute of Pesticide Formulation Technology (IPFT), Gurugram, Ministry of Chemicals & Fertilizers, Government of India bakrime ong·atangaha.
Programona mongsonggipa ong·e sokbagipa NEHU Turani VC Prof. P. S. Shukla, an·tangan Agricultural Scientist ong·e, sam on·gija rongtale ge·na gamna nanganiko aganangaha. Ia program rangchi ge·e game cha·giparangnasan gital ma·sianirangkosan on·aigija, chatro chatrirangnaba ge·e game cha·baani ja·pangko ma·sie ra·na aro dake nina cholko on·a nanga ine Shukla aganangaha.
A·jao songdong a·chakamgiparangni ge·a gamanio daka rikaniko ja·rikbaani, man·enggipa biterangni rokkomrang aro ma·gitcham pa·gitchamrangni dakbaaniko jakkalan baksa gital chasongni cholrangko jakkaldape ripingna nangani bidingo NEHU Tura campusni Campus Director, Prof. Sujata Gurudev talatangaha.
Me·su samjakrango nangana bate samrangko on·anichi a·arangna aro mandeni be·en bimangna namgijaniko ra·baani aro ia a·selrangoni naljokna man·agita bisi grigipa samtangtango man·aigipa samrangko jakkalani bidingo IPFT, Gurugram ni Director Dr. Mohana Krishna Reddy Mudiam aganangskaaha. ABMFT ni HoD, Prof. Deepak Bhagat ge·e game cha·giparangna department o donggipa porikka ra·e niani aro cha·ani tariani kolrangko mesoke on·angaha.
Programo sak 350 mang ge·e game cha·giparang bakko ra·angaha aro uamangna bag, chosma, glove, chola aro skie ra·ani ki·tap rangkoba suale on·angjolaha.
