West Garo Hills Wadagokgre joloniko niamgri a·arangko wang·e dingtang dingtang gamrangko bikote nosto ong·atenganiko dontongatchinagita A∙chik Conscious Holistically Integrated Krima (ACHIK) dolrang sorkari aro District Administration ko didiangaha. Indake a·arangko konge gamrangko bikotaniara pagitcham ma·gitchamoni man·rikrikbaenggipa pilak gitcham gamjin aro buring bolgrimrangna namen kenchakbeani ong·enga ine ACHIK dolrang mikrakataniko on·ataha.
Ia songko “Valley of Echoes” ba rong·kuchak ine mingsinggipa ong·a jeon ma·gitcham pagitchamrangni dakbewal rikbewalrangni nisan, bebe ra·gipa biap aro bosturang unbaksana rongtalgipa biap ong·ani gimin chasong gitchamni nokjamrangko naljoke rakkina aro bisik rakgipa ba re·malgijagipa buring bolgrimrangko ripingan baksana Tourism ni a·bao tang·doaniko ra·banagita ACHIK dolrang janape didiangaha. Dal·dalgipa aro bilakgipa kolrangko jakkale gamrangko bikotanichi ripinge rakkigimin buring bolgrim, a·bri a·kongna namen kenchakani ong·enga maina indake a·arangko kitanichi a·arang ran·krakani a·selo rurongaona soke buringrangko nisiataona ra·baaniko niknagita man·enga ineba janapangaha.
Indakgipa obostarangoniko naljokatna man·agita aro Wadagokgre songko ripingnagita an·tangtangko kang·kare kae, an·tangtangan nokgipagita chacha gitcham daka rikaniko, buring bolgrim, a·bri a·kong aro matburingrangko naljoke rakkie ripingnagita didianiko dakataha. Unbaksana UNESCO, ICOMOS aro gipin dolrang baksa bakrime tangka paisanigita aro dingtang dingtang namgipa cholrangko bikote ja·kurangko de·e ba golpogrikanirangko dake ia gamchatgipa aro mingsinggipa biap ba songko ripingna dakchakani ong·atnagita ine ACHIK dolrang mol·molatan baksa didiangaha.
