2024 Lok Sabha electionko namgipa bimango matchotatna man·agita, Meghalaya a·dokni bang·a bakrango Static Surveillance Team (SST) dolrang rama jal·angrango nirok sandianirangko dakangenga. Ian pu·onani salko name matchotatna a·dokni Election Commision, District Administration aro gipin daito ga·akgipa departmentrang bimchipe nirok simsake kamrangko ka·na a·bachengataha.
Soroko re·ruraenggipa garirangoniko niamgri churangko ra·ruraaniko, tangka paisarangko bang·e ra·bitaniko, silchi dare ba gulirangko aro a·doko so·sojengjeng ong·ataona sokatgipa bosturangko ra·anganirangko name nirokangenga. April 19 tariko electionko ong·atna tik ka·manaonin niamo pangchake bang·a dakna beng·anirang ba Model Code of Conduct ko ja·rikna nanganikoba a·bachengataha.
