TMC dolrang EGH Rongjeng ni Rongchek Akong songo LS election-na campaign ka·anio, Tura ni biapo susanasienggipa Zenith Sangma, re∙anggipa 2019 bilsini Lok Sabha election-o NPP bang∙bate vote rangko man∙e chegenchimoba, TMC dol gnigipa gadango ong∙e adita voterangko man∙angaha ine aganangaha. Iako aganengon, BJP, Congress aro gipin party rang maming dakeba ua gadangona sokdona man∙jaha aro TMC ni vote rang ua somoion adita dongahani gimin, ia chango NPP baksa bil·tinggrike susanagita TMC dolna agre darang party ba man∙jawa ine Sangma agandapangaha.
Garo Hills ni ki∙tikbri dingtang dingtang biaprangona wenaniko dakahaon, manderangni NPP ko namnikgijaniko aro Dr. Mukul Sangma ni dilaniko nangnikaniko u∙ina man∙aha ine Sangma parakataha. Indake ong∙engon re∙anggipa sal somoirango TMC dolni MP na susaanio bimingrangko parakningija donani gimin bang∙a manderang suk ong·gija susanagipa dongjawa ine chanchichipe Congress ni Saleng Sangma na manderangni pu∙onangskana miksonganikoba Sangma parakangaha. Ia kattarangko knae TMC dolrang MP na susana uko biming mingani ja·mano, da∙o manderang TMC baksa bakrime raken kamrangko ka∙e re∙mikkangna ja∙kurangko deangenga ine Sangma janapangaha.
Garo Hills o Congress, TMC aro BJP dolrangna sualgrike pu∙ongenchimode voterangko nosto ka∙e galaona sokgen, uni gimin TMC mangmangna bimchipe pu∙onanichisa gitalgipa MP ko seoknagita man∙gen ine Sangma manderangna didianiko on∙angaha. Unbaksana da∙o ong∙enggipa MP, ma∙mong sorkarini chamatgipa schemerangko kakket ong∙e jakkaljaenga ineba Sangma matnange aganangaha.
