April 22 oni May 16 tarikona Rangpo Sikkim-o ong·atnasienggipa North East Senior Women’s camp o bakko ra·nagita BCCI ni National Cricket Academy (NCA), Meghalaya Cricket Asssociation ni nambatsranggipa sak 4 me·chik rangko seokangaha.
Ia sak 4 seokako man·giparangara Debasmita Dutta, Ajima Sangma, Luiza Tamang aro Monica Lyngdoh Phawa ong·a. Uamang dingtang dingtang North East a·dokrang jekai Sikkim, Manipur, Mizoram, Nagaland aro Arunachal Pradesh oni cricket kal·giparang baksa camp-o bakko ra·anggen.
2023-2024 BCCI tournament ni Senior Women’s T20 Trophy ko re·anggipa bilsini October jao ong·atgipa aro Senior Women’s One Day Trophy jekon ia bilsini January jao ong·atgipao kal·anirango pangchake nambate kal·giparangoniko seokaniko dakangaha.
