Re∙baenggipa Lok Sabha 2024 election na campaign ka·aniko South Garo Hills ni Siju songo manderang baksa chanchirimaniko dakna tom·bimonganiko dakon, a∙song gimiko jatna kakket ong∙e kam ka∙gipade Congress dolsan ong∙a ine Saleng Sangma aganangaha.
Tom∙anio aganengon, ma∙mong sorkariko chalaienggipa BJP party aro gipin party rangni jat aro toromko basee a∙songko rikanina Sangma matnange agananangaha. Congress party ni jat aro toromko basegija gimikni namgnina chanchie dangdike on·ani bewalko ua aganangan baksana a∙dokni dilgiparang jekai P A. Sangma aro Mukul Sangma ko party mikkang nitegija dal∙ate chuatakoba ua agandapangaha.
BJP sorkarini a∙songko chalaiengon gipin toromrang aro Christianrang bang∙a neng∙nikanirangko chagrongna nangenga aro gilja nokrangko nosto ka∙aniko Manipur, Assam aro dingtang dingtang a∙dokrango nikna man∙enga ine Sangma matnangangaha. Una agreba ia electiono NPP na pu∙onana batede BJP nan on∙srangbo ine ua manderangna aganange jat aro toromko warachaknade Congress party na pu∙onachisa chu∙sokatna man∙gen ineba Sangma agananga.
