Da∙al salni bako Resu ni A∙king Nokma Methina Farida Marak an∙tangni a∙kingni 106 acre a∙arangko Logistics Park ko kulinagita, Meghalaya Industrial Development Corporation Limited (MIDC) na pakwate on∙angaha. Ia a∙ao Logistics Park-ko kulianichi a∙dokni logistic sector-ko aro manderangni janggitangani gadangrangko tang∙doatnagita cholko on∙ani ong∙gen.
MIDC ni Chairman James P.K. Sangma ia a∙arangko pakwate on∙anina aro MIDC baksa bakrime indakgipa ja∙kuko de∙e songtangko tang∙doatna namgipa cholrangko ra∙baanina A∙kingni Nokma aro uni madrangrangko mittelangaha. Ia Logistics Park-ko kulianichi bosturangko ra∙baanio somoirangko bakkandikate pilak gamna nanggnigipa damrangko komibata damrango ra∙nagita cholko on∙anggen ine Sangma aganangaha.
Nokma Advisory Committee ni Chairperson Abraham V J ia project ni gamchataniko janapangaha jekon ra∙baanichi chamdamberangni janggi tangani cholrangko tang∙doatna dakchakani ong∙anggen ine aganangaha. Batanggimin somoirangoba Nokma ni dilanichi uamang chadamberangni janggitangani cholrangko tang∙doatna bang∙a kamrangko ka∙angaha, indiba da∙o dipet ia project-an dal∙batgipa ja∙ku de∙ani ong∙a aro MIDC baksa bakrimna chol man∙anina uamangni kusi ong∙anikoba Abraham parakangaha.
Ia a∙arangko Nokmani pakwate on∙anian a∙dokko tang∙doatna re∙mikkange kam ka∙na ja∙ku de∙ani ong∙an baksana mikkangchi songsulni dilgiparang aro development agency rang baksa a∙doko rika cho∙ani gadangrangko nambatatani ong∙a.
