North Garo Hills Mendipathar o Pepsi aro dingtang dingtang ringani bosturangko tarichakani karkanako riknagita M/s Varun Beverages Ltd na da·al salo Meghalaya Industrial Development Corporation (MIDC) a·arangko on·a tik ka·ani lekka pancharangko pakwatangaha. Ia karkanako bang·gija salrangna skang sorkarini ra·bagipa Meghalaya Industrial and Investment Promotion Policy (MIIPP) 2024 ni ning·o rikangna tik ka·aha.
Iako dakna chanchianiara mikkangchi jolni sak 500 manderangna kam bikote on·ani aro Garo Hills ni chu·gimik tang·doaninaba dakchakani ong·gen ine MIDC ni Chairman James Sangma aganangaha. Ua dingtang mancha MIDC ni kam ka·anirangko aganange ian Meghalaya a·dokko 10 billion kajina man·aona sokdona kam ka·aniba ong·enga ine Sangma aganangaha.
M/s Varun Beverages Ltd ge·sa India a·songni dingtang dingtang biaprango Pepsi ni karkanarangko chalaienggipa ong·a aro Pepsi company ia karkanako rike chalaina crore 100 na batpile tangka paisarangko chamataha. Ia karkanao Pepsi aro dingtang dingtang bosturangko tarie Meghalaya, North Bengal aro Assam a·dokni adita biaprangona palnagita sokatnasienga.
MIIPP 2024 ko a·bachengate dingtang dingtang private investor rang baksaba crore 2,957 mang tangkarangna Memorandum of Understanding (MoU) rangko soi ka·angaha. Indake private company rang baksa bakrime kamrangko ka·anichi a·doko manderangna kamrangko nakatatna man·an baksana bading chiwalani a·bao nengraatnagitaba man·anggen ine Chief Minister Conrad Sangma aganangaha.
